Bu gün AFFA İntizam Komitəsi Misli Premyer Liqasının XXVIII turda qeydə alınan neqativ hallarla bağlı qərarlar verib.
Offsideplus.az xəbər verir ki, “Qarabağ” klubu "Turan Tovuz"la oyunda azarkeşlərin pirotexniki vasitədən istifadə etməsinə görə 1500 manat cərimələnib.
Həmin matçda Tovuz təmsilçisinin 4 futbolçusu sarı vərəqə alıb. Qaydalara əsasən, "Turan Tovuz" 700 manat cərimə ödəməlidir.
Martın 29-da keçirilən “Neftçi” - “Araz-Naxçıvan” qarşılaşmasının da hər iki iştirakçısına cərimə kəsilib. Belə ki, meydan sahiblərindən 6 nəfər sarı vərəqə aldığı üçün AFFA-nın büdcəsinə 700 manat köçürüləcək.
“Araz-Naxçıvan”da isə futbolçunun formasında qüsur aşkarlanıb. Bu səbəb matçın startı gecikib. İntizam Komitəsi “Araz-Naxçıvan”ı 800 manat cərimələyib.
