Daha bir ulduz futbolçu mövsüm sonunda "Real Madrid" klubuna keçməyi arzulayır.
Offsideplus.az xəbər verir ki, "Mançester Siti"nin və İspaniya millisinin yarımmüdafiəçisi Rodri karyerasını "Real Madrid"də davam etdirmək niyyətindədir. 29 yaşlı futbolçu İspaniya mətbuatına verdiyi son müsahibədə karyerası ilə bağlı gözlənilməz etiraflar edib.
İspaniyanın "Onda Sero" radiosuna danışan ulduz futbolçu gələcəkdə vətəninə qayıtmaq istədiyini gizlətməyib. Rodri "Real Madrid"ə mümkün transferi ilə bağlı suala olduqca açıq cavab verib:
"Dünyanın ən yaxşı klublarına 'yox' demək sadəcə olaraq qeyri-mümkündür. Bəli, mən gələcəkdə yenidən İspaniyaya qayıtmaq istərdim, bu, tamamilə təbiidir."
Keçmişdə "Real Madrid"in əzəli rəqibi "Atletiko Madrid"də çıxış etdiyini xatırladan Rodri bunun "kral klubu"na keçidinə maneə yaratmayacağını və futbol tarixində bir çox oyunçunun bu yolu seçdiyini vurğulayıb. Müsahibədən sonra "Mançester Siti" azarkeşləri tərəfindən tənqid atəşinə tutulan futbolçu sözlərinin mətbuat tərəfindən kontekstdən çıxarıldığını desə də, Madrid klubuna açıq qapı saxladığını gizlədə bilməyib.
İspaniya mətbuatının yaydığı məlumatlara görə, "Real Madrid" rəhbərliyi Rodri layihəsinə maraqla yanaşsa da, bəzi tərəddüdlər yaşayır. Madrid təmsilçisini düşündürən əsas məqamlar bunlardır:
- Müqavilə müddəti: Rodrinin "Mançester Siti" ilə müqaviləsi 2027-ci ilin yayında başa çatır. İngiltərə klubu futbolçunu pulsuz itirməmək üçün yaxın aylarda onu satmağa məcbur ola bilər.
- Zədə riski: 2024-cü ildə ağır diz zədəsi (AÇL) alan futbolçunun yaşı artıq 30-a yaxınlaşır. "Real Madrid" isə transfer bazarında daha çox gənc istedadlara (məsələn, PSJ-nin yarımmüdafiəçisi Vitinyaya) üstünlük verir.
- "Qızıl Top" gərginliyi: 2024-cü ildə Rodrinin Vinisius Junioru qabaqlayaraq "Qızıl Top"u qazanması "Real Madrid" tərəfindən boykotla qarşılanmışdı. Bu transfer baş tutacağı təqdirdə Rodrinin Madrid paltarı dəyişmə otağında necə qarşılanacağı maraq doğurur.
"Mançester Siti" ilə hələlik yeni müqavilə imzalamayan Rodri gələcəyi barədə qəti qərarını mövsümün sonunda verəcək.
