Fransalı ulduz Viktor Vembanyama növbəti möhtəşəm çıxışı ilə "San Antonio Spurs"u 2026/27 NBA mövsümündə doqquzuncu ardıcıl qələbəyə daşıyıb. Komanda "Phoenix Suns" üzərində 122:96 hesablı inamlı qələbə qazanıb. Vembanyama 19 atışdan 15-ni dəqiq yerinə yetirərək 40 xal toplayıb, 11 ribaund, 9 blokşut və 3 assistlə meydançada dominantlıq edib. O, oyundan sonra bildirib: "Özümü istədiyim yerdə hiss edirəm. Rəqiblər məni çıxılmaz vəziyyətə sala bilmir, indi sadəcə özümə mane olmamalıyam".
Offsideplus.az xəbər verir ki, Serbiya millisinin lideri Nikola Yokiç zədəsinə baxmayaraq "Denver Nuggets"in heyətində meydana çıxıb və 25 xal, 16 ribaund, 9 assist, 2 blokşut və 1 top oğurlama ilə fərqlənib. Lakin bu göstəricilər "Denver Nuggets"in "Houston Rockets"ə 100:110 hesabı ilə məğlub olmasının qarşısını ala bilməyib. Yokiç oyundan sonra səfər yorğunluğuna toxunaraq deyib: "Biz oynamaq üçün pul alırıq. Heç bir bəhanə yoxdur. Hazır idik".
"Houston Rockets"in mərkəz oyunçusu Alperen Səngün isə 20 xal, 11 ribaund, 8 assist, 1 blokşut və 1 top oğurlama ilə parlaq çıxış edib. Serbiyalı ehtiyat oyunçu Boqdan Boqdanoviç isə 8 xal toplayıb. "Houston Rockets"də isveçrəli Klint Kapela zədə səbəbindən meydana çıxmayıb. Səngün Yokiçlə qarşılaşmaq barədə deyib: "Onunla oynamaq həmişə maraqlıdır. Hər dəfə özümü sınayıram, bütün oyun boyu onu qorumağa çalışıram. Keçən yay milli komandada da bir neçə dəfə qarşılaşmışdıq. Onunla oynamaq həmişə möhtəşəmdir".
Sloveniyalı Luka Donçiçin rəhbərliyi ilə "Los Anceles Leykers" altıncı ardıcıl qələbəsini qazanıb. Donçiç "Atlanta Hawks" üzərində 124:112 hesablı qələbədə 32 xal, 10 assist, 8 ribaund, 5 top oğurlama və 2 blokşutla komandasına liderlik edib. Gürcü ehtiyat oyunçu Sandro Mamukelaşvili isə 23 xal toplayıb və bildirib: "Özümü yaxşı hiss edirəm. Yaxşı oyun oldu. Komanda sona qədər mübarizə apardı, atışlarımızı dəqiq yerinə yetirdik. Sadəcə öz oyunumuzu oynadıq və inandıq".
"Charlotte Hornets" isə "Cleveland Cavaliers" üzərində 124:112 hesabı ilə qalib gəlib. Fransalı ehtiyat oyunçu Tidjan Salaun ikinci hissədə 14 xal toplayaraq komandasına əlavə güc verib. O, deyib: "Məqsədim ən yaxşı oyunçu olmaq və komanda yoldaşlarıma qələbə qazandırmaqdır". "Hornets"də almaniyalı Kristian Anderson Jr. 9, Hannes Ştaynbax isə 2 xal toplayıb. Fransa millisinin üzvü Musa Diabate və Almaniyadan Dennis Şröder zədə səbəbindən meydana çıxmayıb. "Cavaliers"də xorvatiyalı Mario Hezonya 10 xalla yadda qalıb.
Avropalı baş məşqçilərin duelində finlandiyalı Tuomas İisalo rəhbərlik etdiyi "Memphis Grizzlies" səfərdə serbiyalı Darko Rajakoviçin çalışdırdığı "Toronto Raptors"u 118:102 hesabı ilə məğlub edib. "Grizzlies"də hollandiyalı Kvinten Post baş zədəsi səbəbindən ilk hissədə meydanı tərk edib və xal toplaya bilməyib. "Raptors"un avstriyalı mərkəz oyunçusu Yakob Pöltl isə 18 xal və 4 blokşutla fərqlənib. O, bildirib: "Hər zaman inkişaf üçün yer var. Sadəcə analiz edib, növbəti dəfə daha yaxşı oynamağa çalışacağam".
