Misli Premyer Liqasının 5-ci turunun mərkəzi qarşılaşması bu axşam baş tutacaq.  "Zirə" öz meydanında "Qarabağ"ı qəbul edəcək.

Liderlik uğrunda prinsipial döyüş

Hazırda hər iki komandanın aktivində 9 xal var və turnir cədvəlinin üst pillələrində qərarlaşıblar. Lakin "Zirə" keçirdiyi matçlarda artıq xal itkisi ilə üzləşdiyi halda, "Qarabağ" bir oyun az keçirərək 100 faizlik nəticə göstərməyi bacarıb. Hər iki kollektiv üçün bu matç təkcə 3 xal deyil, həm də turnir cədvəlinin zirvəsinə çıxmaq imkanı deməkdir.

Tarixi üstünlük "Kəhər atlar"ın tərəfindədir

Rəqiblər bu günə qədər ölkə çempionatında 42 dəfə üz-üzə gəliblər. Keçirilən qarşılaşmaların statistikasına nəzər salsaq, "Qarabağ"ın aşkar üstünlüyünü görmək mümkündür:

"Qarabağ"ın qələbəsi: 27

Heç-heçə: 13

"Zirə"nin qələbəsi: 2

Top fərqi: 85-24 ("Qarabağ"ın lehinə)

Cütün tarixində ən böyük hesablı qələbələr 2018/19 və 2019/20 mövsümlərində qeydə alınıb. Maraqlı məqam odur ki, hər iki matçda Ağdam təmsilçisi məhz səfərdə "Zirə"ni 6:0 hesabı ilə darmadağın etməyi bacarıb.

Psixoloji durum və komandalarda son vəziyyət

Mütəxəssislərin rəyinə görə, qarşılaşmanın favoriti "Qarabağ" hesab olunur. Lakin "Zirə"nin son turda "Sabah"a böyük hesabla uduzması komanda daxilindəki psixoloji ab-havaya mənfi təsir göstərə bilər. Digər tərəfdən, Rəşad Sadıqovun yetirmələrinin bu ağır məğlubiyyətdən nəticə çıxararaq "Qarabağ"la matça daha prinsipial və fərqli motivasiya ilə çıxacağı da istisna olunmur.

Ağdam təmsilçisi hər mövsüm olduğu kimi bu il də qızıl medallar uğrunda ən iddialı komandalardandır. Bu baxımdan, iki iddialı kollektivin dueli azarkeşlərə böyük futbol həyəcanı vəd edir.

Adına layiq, gərgin və bol qollu mərkəzi matçın şahidi olmaq ümidi ilə!