Azərbaycan Kuboku uğrunda yarışın yarımfinalında ən çox gözlənilən oyun bu gün "Neftçi Arena"da keçirilib.

Offsideplus.az xəbər verir ki, bu stadionda Avropa miqyaslı yarışlara düşmək istəyən 2 komanda - "Neftçi” və “Sabah” üz-üzə gəlib.

Premyer Liqada orta sıralarda qərarlaşan bu klubların avrokuboklara vəsiqə qazanması üçün yeganə vasitə kubokdur. Bu səbəbdən tərəflər qarşılaşmaya çox ciddi hazırlamışdılar. "Sabah" səfərdə 2:1 hesablı qələbə qazanıb. Cavab görüşü aprelin 23-də gerçəkləşəcək.

Azərbaycan Kuboku, yarımfinal, ilk oyun

"Neftçi" - "Sabah" 1:2

Yuri Matias, 21 - Azər Salahlı, 11 (avtoqol); Pavel Şafranko, 52

Neftçi Arena. Saat 19:30

Hakimlər: Əliyar Ağayev, Zeynal Zeynalov, Akif Əmirəli, Cavid Cəlilov

VAR: Rauf Allahverdiyev

AVAR: Kamran Bayramov

Hakim-inspektor: Ömər Paşayev

11-ci dəq. "Sabah"ın künc zərbəsi zamanı "Neftçi"nin müdafiəçisi Azər Salahlı topu uzaqlaşdırmaq istəyərkən, öz qapısına göndərir. Məhz bu epizoddan öncə baş hakim Əliyar Ağayev Azər Salahlı və "Sabah"dan Rəhman Daşdəmirovu yanına çağıraraq, onlara cərimə meydançasında qaydalar çərçivəsində oynamağı tapşırmışdı. Ancaq epizodun davamında Rəhman Azəri səhv buraxmağa sövq edir

21-ci dəq. Tellur Mütəllimov "Neftçi"nin hücumçusu Ağadadaş Salyanskiyə qarşı kobud oynadığına görə, "Sabah"ın qapısına penalti təyin edilir. Yuri Matiasın zərbəsini qapıçı qaytarsa da, braziliyalı müdafiəçi təkrar zərbə ilə hesabı bərabərləşdirir- 1:1

52-ci dəq. Xəyal Əliyevin zərbəsi dirəkdən qayıdır, Pavel Şafranko isə topu "Neftçi"nin boş qapısına göndərir

60-cı dəq. "Neftçi"də Ramil Şeydayev və Ağadadaş Salyanski oyundan çıxır. Onların əvəzinə Filipp Ozobiç və Dembo Darbo mübarizəyə qoşulur

64-cü dəq. Cərimə zərbəsindən göndərilən topu Yuri Matias başla "çərçivəyə göndərir. "Sabah"ı qoldan qapı tiri xilas edir

89-cu dəq. "Sabah" 3-cü qolu vura bilərdi. Tellur Mütəllimovun güclü zərbəsinə "Neftçi"nin qapıçısı Rza Cəfərov barmaqlarının ucu ilə toxunur və top qapı tirinə dəyərək, meydançanı tərk edir