Çempionlar Liqasının 3-cü turunda “Borussiya” “Sabah”a qalib gəldi - 1:2.

Offsideplus.az xəbər verir ki, oyundan sonra keçirilən mətbuat konfransında rəqibin baş məşqçisi Niko Kovaç media önünə çıxıb:

“Bizim üçün çox, çox vacib qələbə oldu və oyunun gedişatına, nümayiş etdirdiyimiz futbola görə də çox məmnunam. Xüsusilə hücumda çox yaxşı çıxış etdik. Qələbəmiz də tamamilə layiqli idi. Çünki qarşımızda sona qədər mübarizə aparan, fədakarlıq göstərən rəqib komanda var idi. Komandam bu gün həqiqətən çox yaxşı oynadı. Açıq desəm, yaxşı futbol nümayiş etdirdik, çoxlu qol imkanları yaratdıq. Bəlkə də daha çox qol vurmalı idik. Bu, qeyd edə biləcəyim yeganə kiçik çatışmazlıqdır. Amma bundan başqa, xüsusilə səfər oyununda, ardıcıl üçüncü səfər matçında nümayiş etdirdiyimiz oyundan çox razıyam”.

Çukuvueka haqqında suala belə cavab verib:

“İlk 10 dəqiqədə səhv etmirəmsə, qapıya beş zərbə vurmuşduq. Həmin vaxt o, sağ cinahda aktiv idi. Bu, yaxşı idi. Məncə, müdafiədə də yaxşı oynadı. Həqiqətən səy göstərdi, ikili mübarizələrə girməkdən çəkinmədi”.

“Onlar dəfələrlə rəqib müdafiəsini yarmağı bacardılar. İstər cinah boyunca hərəkət edərkən, istərsə də mərkəzdə, səkkiz nömrə mövqeyində oynayan futbolçuların köməyi ilə. Bu gün hücumda çıxış edən iki hücumçu da bunu yaxşı etdi. Fabio da boş zonalar yaratdı və bunun sayəsində digər futbolçu tək qaldığı zaman ehtiyac duyduğu boş sahəni əldə etdi. Əslində, mən səkkiz nömrə mövqeyində oynayan futbolçularımızın dəstəyini də alırdım. Bu cür quruluşda onu nəzarətdə saxlamaq nisbətən asan olurdu”.

Hər iki hissənin əvvəlində vurulan iki qol və təzyiqlər barədə: 

“Dediyim kimi, ilk 10 dəqiqədə, səhv etmirəmsə, qapıya beş zərbə vurduq. Həmin vaxt artıq fürsətləri əldən vermişdik. Əslində, iki, hətta üç qol vurmalı idik. Məhz bu məqamı təhlil etməliyik. Məqsədimiz oyunu mümkün qədər tez öz xeyrimizə çevirmək idi. Təbii ki, bununla həm də azarkeşlərin coşqunluğunu bir qədər azaltmaq, tribunadakı atmosferi sakitləşdirmək istəyirdik. 30-cu dəqiqəyə qədər bunu həqiqətən yaxşı bacardıq. Lakin sonradan ötürmələrdə etdiyimiz kiçik səhvlər rəqibə yenidən oyuna qayıtmaq imkanı verdi. Bununla belə, deməliyəm ki, biz yaxşı oynadıq, amma rəqib də həqiqətən çox yaxşı çıxış etdi”.

“Sabah” haqqında:

“Çoxları düşünür ki, Norveçə səfərə gedirsən və orada oynamaq asandır. Eyni şəkildə, düşünürlər ki, Azərbaycana səfər etmək də asandır. Xeyr, bu, heç də asan deyil. Burada yaxşı taktiki və texniki hazırlığa malik, fiziki cəhətdən güclü futbolçular var. Onların baş məşqçisi də komandanı oyunlara çox yaxşı hazırlayıb. Bu, təkcə bugünkü matça aid deyil. Sonuncu “Slaviya” ilə oyunda və seçmə mərhələnin qarşılaşmalarında da bunu gördük.

Ona görə də təəccüblənmədim. Çünki “Sabah”ın bir çox oyununu izləmişəm. Əminəm ki, qarşıdakı matçlarda bir çox rəqib bu komanda ilə oyunda çətinlik çəkəcək. Hələ qarşıda beş oyun var və düşünürəm ki, “Sabah” rəqiblərinə ciddi problemlər yaradacaq”.