"Paris Sen-Jermen" klubunun baş məşqçisi Luis Enrike Gürcüstan millisinin və Fransa təmsilçisinin ulduz futbolçusu Xviça Kvaratsxeliya üçün ödənilən yüksək transfer haqqının səbəblərini izah edib.

Offsideplus.az xəbər verir ki, ispaniyalı mütəxəssis gürcü vingeri heyətlərinə qatmazdan əvvəl onun oyununu necə analiz etdiklərini və heyran qaldığı məqamları bölüşüb.

Luis Enrike ulduz futbolçunun adını ilk dəfə eşidəndə təəccübləndiyini və skautlardan maraqlı bir məsləhət aldığını bildirib:

"Onun adı ilk dəfə gündəmə gələndə, açığı, haqqında çox az şey bilirdim. Gürcüstan Avropanın nəhəng klublarının diqqətini çəkən oyunçuları mütəmadi olaraq yetişdirən bir ölkə deyil, buna görə də təbii olaraq maraqlandım. Bir skaut mənə, 'Topa baxma. O, topu qəbul edəndə müdafiəçiləri izlə' dedi. Bu mənə qəribə məsləhət kimi gəlmişdi, amma o, haqlı idi."

"Napoli" klubunun oyunları zamanı futbolçunu xüsusi diqqətlə izlədiyini deyən təcrübəli mütəxəssis Kvaratsxeliyanın sahədə yaratdığı unikal effekti belə təsvir edib:

"Onun 'Napoli' forması ilə keçirdiyi bir matçda Xviça hər dəfə topa toxunanda iki, yaxud üç müdafiəçi anında ona tərəf yönəlirdi. Sanki rəqib komandanın bütün müdafiə nizamı tək bir oyunçuya görə dəyişirdi. İyirmi dəqiqədən sonra onun fəndlərinə fokuslanmağı dayandırdım və sahədə yaratdığı təsiri izləməyə başladım. Ən böyük oyunçular sadəcə oyunu oynamırlar; onlar sahədəki hər kəsin davranışını dəyişirlər."

Luis Enrike oyun bitdikdən dərhal sonra köməkçiləri ilə danışdığını və gələcəyə dair böyük bir potensial gördüyünü vurğulayıb:
"Matç bitəndə köməkçilərimə tərəf dönüb dedim: 'Müdafiəçilər daha indidən ondan bu qədər çəkinirlərsə, üç-dörd il sonra necə bir oyunçuya çevriləcəyini bir təsəvvür edin'. Məhz həmin an, həqiqətən də xüsusi bir istedadla qarşı-qarşıya olduğumuzu anladıq."