Bakının "Sabah" klubu Azərbaycan çempionatlarında rekord vurub.

Offsideplus.az xəbər verir ki, "bayquşlar" bir mövsümdə ən çox heç-heçə edən komanda adına sahib çıxıb. Sözügedən klub bu mövsüm 15 dəfə heç-heçə oynayıb.

Rekord dünən Misli Premyer Liqasının XXVIII turunda “Sumqayıt”la görüşdə rəsmiləşib (3:3).

İndiyədək “Neftçi” (2009/10), “Bakı” (2012/13) və “Zirə” (2020/21) bir mövsümdə hərəyə 14 dəfə "sülh"ə razılaşmışdı.

3:3 hesabı digər bir məqama görə də diqqətçəkən olub. Bu, ölkə çempionatları tarixində ən azı 6 qolun vurulduğu 17-ci heç-heçədir.

1992-ci ildən keçirilən yarışda 1 dəfə 6:6, 1 dəfə 4:4, 15 dəfə 3:3 hesabı qeydə alınıb.

“Sabah” üçüncü dəfə, "Sumqayıt” isə ikinci dəfə meydançanı 3:3 hesabı ilə tərk edib.

O ki qaldı ən çox qol vurulan heç-heçəyə, mütləq rekord 25 aprel 1999-cu ildə “Viləş” - “Turan” qarşılaşmasında olub - 6:6.