Slovakiyadan olan azarkeş Frantişek Favrik və onun 18 yaşlı oğlu "Barselona" ilə "Real Madrid" arasında keçirilən oyunda Kilian Mbappenin qolunu qeyd etdikləri üçün "Kamp Nou" stadionundan çıxarılıb.
Offsideplus.az xəbər verir ki, Favrik bu hadisəni İspaniya mətbuatına danışıb. O, oğlunun 18 yaşını qeyd etmək üçün ona ilk "El-Klasiko" oyununu canlı izləmək imkanı yaratmaq istəyib. Ailə Slovakiyanın Preşov şəhərindən əvvəlcə 300 kilometr məsafəni avtomobillə Budapeştə gedib, oradan isə təyyarə ilə Barselonaya yollanıb. Favrik dörd birinci kateqoriya bileti Slovakiya agentliyi vasitəsilə ümumilikdə 5600 avroya (hər biri 1400 avro) alıb. Oyunçularla bərabər dostu və dostunun oğlu da stadiona gəlib.
Favrikin sözlərinə görə, stadionun girişində təhlükəsizlik xidməti onlara "Real Madrid" forması ilə tribunaya keçməyin qadağan olduğunu bildirib. O, "Santyaqo Bernabeu"dan aldığı formanı atmaqdan imtina edib. Sonda ata və oğul formalarını çıxarıb, stadiona daxil olduqdan sonra isə oyundan təxminən 20 dəqiqə əvvəl yenidən geyiniblər. Favrik vurğulayıb ki, onlar "Barselona" azarkeşlərini qəsdən qıcıqlandırmaq niyyətində olmayıb və Mbappenin təxminən 40-cı dəqiqədə vurduğu qoldan bir saat əvvəl artıq "Real Madrid" forması geyiniblər.
Qoldan sonra ata və oğul ayağa qalxıb, bir-birini qucaqlayaraq seviniblər, sonra isə yerlərinə oturublar. Favrikin dediyinə görə, təxminən on təhlükəsizlik əməkdaşı onları tribunadan çıxarıb. Yol boyu digər azarkeşlər onlara qarşı xoşagəlməz jestlər göstərib və fitə basıb, lakin ata və oğul heç bir cavab verməyib. Əvvəlcə onlara formalarını çıxarsalar, geri qayıda biləcəkləri deyilib, lakin daha sonra təhlükəsizlik əməkdaşları qərarı dəyişib və onların təhlükəsizliyinə zəmanət verə bilməyəcəklərini bildiriblər. Polis ata və oğulun sənədlərini yoxlayıb və onlarla söhbət aparıb.
Favrik qeyd edib ki, tərtib olunan protokolda "Real Madrid" formasının nümayiş etdirilməsi, "Barselona" azarkeşlərinə qarşı istehza və zorakılıq kimi qiymətləndirilə biləcək hərəkətlər qeyd olunub. O, bu ittihamları rədd edir və hadisənin videoyazılarına və şahid ifadələrinə baxılmasını istəyir. Sonda Favrik və oğlu taksi ilə stadiona yaxınlaşıb və oyunun qalan hissəsini telefondan izləyiblər. O, pulsuz bilet və ya xüsusi münasibət tələb etmədiyini, iki klubun azarkeşləri arasında düşmənçiliyin artmasını istəmədiyini bildirib.
