NBA-də Minnesota Timberwolves və Detroit Pistons arasında keçirilən oyun qalmaqalla yadda qalıb. 

Offsideplus.az xəbər verir ki, Minnesota komandasının 123:104 hesablı qələbəsi ilə başa çatan matçda ikinci hissənin əvvəlində dava düşüb və nəticədə 5 oyunçu, 2 məşqçi meydançadan uzaqlaşdırılıb.

Hadisə Naz Reidin top sürərkən Detroitin gənc oyunçusu Ron Holland tərəfindən vurulmasına sərt reaksiya verməsi ilə başlayıb. Oyunçular bir-birinə yaxınlaşdıqdan sonra digər komanda üzvləri də müdaxilə edib və mübahisə kütləvi davaya çevrilib. Bu hal zarkeşlərin də narahatlığına səbəb olub.

Hakimlər dava bitdikdən sonra komandalar arasında gərginliyin davam etdiyini görərək Detroitdən Isaiah Stewart, Ron Holland və Marcus Sasser, Minnesotadan isə Naz Reid və Donte DiVincenzonu oyundan kənarlaşdırıb. Həmçinin, Detroitin baş məşqçisi John-Blair Bickerstaff və Minnesota köməkçi məşqçisi Pablo Prigioni də meydandan qovulub.

Bickerstaff insidentin əsas səbəbinin Prigioninin Detroit oyunçularına təhqiramiz sözlər deməsi olduğunu bildirib:

“O, nə dediyini yaxşı bilir. Oyunçularımı müdafiə etməliyəm və kiminsə onlar haqqında nalayiq sözlər işlətməsinə icazə verə bilmərəm”.

Minnesota baş məşqçisi Chris Finch isə qarşılaşmanın əvvəlindən fiziki təmasın həddindən artıq olduğunu və bunun nəticəsində belə bir hadisənin qaçılmaz olduğunu qeyd edib:

“Biz onların fiziki oyun tərzini bilirdik. Sizi vurur, saxlayırlar… Amma bu dəfə hər şey həddini aşdı. Oyunçular işləri öz əllərinə almağa başladılar və bunu heç vaxt istəməzdik”.

NBA rəhbərliyinin baş verən hadisə ilə bağlı əlavə cəzalar tətbiq edib-etməyəcəyi hələ ki, bəlli deyil.