"Real Madrid"in baş məşqçisi Joze Mourinyo komandanın cari forması və göstərdiyi nəticələrlə bağlı açıqlamalar verib.
Offsideplus.az xəbər verir ki, təcrübəli mütəxəssis qısa müddət ərzində əldə edilən irəliləyişdən razı qaldığını bildirib.
Komandasının oynadığı 6 matçdan yalnız 1-də məğlub olduğunu xatırladan Mourinyo qeyd edib: "Komanda öz yolundadır, öz xətti ilə irəliləyir. Artıq üç aydır birlikdəyik və düşünürəm ki, bu dövr üçün yaxşı çıxış edirik."
İnkişafın davamlı olacağını vurğulayan baş məşqçi əlavə edib: "Əgər altı aydan sonra da eyni vəziyyətdə olsaq, bundan razı qalmayacağam. Lakin əminəm ki, dörd-beş ay sonra vəziyyət daha yaxşı olacaq, çünki biz həm fərdi, həm də komanda olaraq davamlı inkişaf prosesindəyik."
