Bakıda futbol akademiyası açmaq istəyən "Barselona" rəhbərliyinin nümayəndələri növbəti dəfə ölkəmizə gəliblər. 

Offsideplus.az oxu.az-a istinadən xəbər verir ki, Kataloniya klubunun Avropa, Orta Şərq və Afrika (EMEA) üzrə akademiyalarının rəhbəri Mark Sabate Ferre, eləcə də Avropa və Afrika üzrə akademiyalarının texniki koordinatoru Bernat Vilya Ay Qorris paytaxtımıza təşrif buyurublar. 

Qonaqlar əvvəlcə "ASK Arena"ya baş çəkiblər. Burada əsas stadionunun durumunu nəzərdən keçiriblər, idmançıların yerləşdiyi bazaya, stadionun ərazisinə və ətrafına baxış keçiriblər.

Akademiya üçün məkan axtaran "Barselona" rəsmiləri daha sonra Mərdəkanda yerləşən "Liv Bona Dea Arena"da olublar. Onlar futbolçuların yerləşdiyi bazanı ziyarət edib, fitness zalı, paltardəyişmə otaqları və yaradılan şəraitlə tanış olublar.

Xatırladaq ki, bu il martın 1-də Bakıya səfərə gələn "Barselona"nın prezidenti Xuan Laporta Azərbaycan Prezidenti İlham Əliyevin qəbulunda olub. Görüş zamanı Azərbaycanda "Barselona"nın akademiyasının yaradılması ilə bağlı sənədin imzalanacağı bildirilib.