FIFA dünya çempionatında iştirak edəcək ölkələr üçün nəzərdə tutulan mükafat fondunda ciddi artım etməyə hazırlaşır.
Offsideplus.az xəbər verir ki, Ali futbol qurumu turnirin gəlirlərinin proqnozlaşdırılan səviyyədən yüksək olması səbəbindən iştirakçı komandalara daha çox vəsait ayırmaq niyyətindədir.
Hazırkı planlara əsasən, turnirdə mübarizə aparacaq 48 komandanın hər biri minimum 10,5 milyon dollar qazanacaq. Çempionluq kubokunu başı üzərinə qaldıracaq komanda üçün isə 50 milyon dollar məbləğində mükafat təyin edilib. Lakin FIFA-nın son qərarı ilə bu məbləğlərin hər iki istiqamətdə artırılacağı gözlənilir.
FIFA bu addımını turnirdən gözlənilən rekord maliyyə göstəriciləri ilə əsaslandırır.
Təşkilatın proqnozlarına görə, növbəti dünya çempionatı dövründə ümumi gəlir 11 milyard dolları ötəcək.
Artan gəlirlər həm milli komandalara, həm də oyunçularını turnirə göndərən "Real Madrid", "Mançester Siti" və "Bavariya" kimi dünya nəhənglərinə ödənilən kompensasiyaların artmasına birbaşa təsir göstərəcək.
Bu maliyyə artımı, xüsusilə debütant ölkələr və inkişaf etməkdə olan futbol federasiyaları üçün böyük stimul hesab olunur. Qərarın rəsmiləşməsi ilə bağlı yaxın vaxtlarda daha detallı cədvəlin açıqlanacağı gözlənilir.
