İspaniyalı forvard Xuanço Hernanqomes "Panatinaikos"da keçirdiyi müddətdən və gələcək planlarından danışıb.

Offsideplus.az xəbər verir ki, 30 yaşlı basketbolçu Yunanıstan klubunda özünü evindəki kimi hiss etdiyini bildirib. "Son üç ildə burada öz yerimi tapdım. Hər şeydən razıyam. Çempionluq uğrunda mübarizə aparmaq və qələbə istəyi məni motivasiya edir", – deyə Hernanqomes vurğulayıb.

O, yay fasiləsində başqa təkliflərin də olduğunu, lakin ailəsinin və özünün Afinaya bağlılığının seçimində əsas rol oynadığını qeyd edib: "Getmək imkanı vardı. Anam həmişə burada olmaq istəyirdi. Hər iki tərəf eyni şeyi istəyəndə qərar vermək asan olur".

Hernanqomes 2025–26 mövsümündə komandanın bəzi çətinliklərlə üzləşdiyini gizlətməyib və bu dövrü açıq şəkildə "uğursuzluq" adlandırıb. O, həmçinin yaxın dostu Cedi Osmanla vidalaşmağın çətin olduğunu bildirib: "Əlbəttə, onu darıxacağam. Burada ən yaxın dostlarımdan biri idi".

İspaniyalı oyunçu "Olimpiakos"a qarşı münasibətinə də toxunub: "Olimpiakos"a qarşı heç bir nifrətim yoxdur. İdman insanları birləşdirməlidir. Azarkeşlərin ehtirasını başa düşürəm, onlar çox vaxt və pul sərf edirlər. Biz də hər gün çox çalışırıq. Məqsədə çatmayanda onların narazılığını anlayıram. Amma bu ehtirası sağlam saxlamaq bizim sosial məsuliyyətimizdir. Əgər biz həddi aşsaq, uşaqlar da bunu görəcək və idman xaosa çevriləcək".

Karyerasından kənarda Hernanqomes artıq sakit həyat üçün şərait qurduğunu, Asturiyada evinin və öz şərabının olduğunu, yaxın gələcəkdə at almağı planlaşdırdığını deyib. O, bu məsələdə keçmiş komanda yoldaşı Nikola Yokiçin məsləhətinə güvəndiyini bildirib: "Hələ atlarım yoxdur, amma Yokiçlə danışacağam".