Fransa millisinin gənc ulduzu Viktor Vembanyama, Belqradda Serbiya ilə keçirilən yoldaşlıq oyunundan sonra çıxışını dəyərləndirib.

Offsideplus.az xəbər verir ki, o, hazırda tam formada olmadığını və komandanın hələ ritm tapmağa çalışdığını bildirib. "Bir az paslanmışam. Hələ də ritm axtarırıq və oyun planlarımızı qururuq. Sonadək mübarizə apardıq, buna görə xüsusilə sevincliyəm", – deyə Vembanyama vurğulayıb.

22 yaşlı mərkəz oyunçusu, Nikola Yokiçlə gərgin mübarizəyə baxmayaraq, qarşılaşmanın fiziki baxımdan sərt keçmədiyini qeyd edib. "Necə göründüyünü bilmirəm, amma bu gün meydançada fiziki oyun olmadı. Hər iki tərəfdən böyük hörmət vardı. Bir epizod bir az aqressiv idi, amma ümumilikdə təmiz oyun keçdi", – deyə o əlavə edib.

Vembanyama, NBA və FIBA oyunları arasında əsas fərqin istifadə olunan topda olduğunu bildirib: "Ən böyük fərq oynadığımız topdadır. NBA ilə müqayisədə bir çox fərqlər var, amma bu, ən önəmlisidir".

Fransa millisi baş məşqçi Frederik Fauthoux-un rəhbərliyi ilə Serbiya ilə ikinci yoxlama oyununu bazar günü Orleanda keçirəcək. Komanda FIBA Dünya Kuboku 2027-nin Avropa seçmə mərhələsinin L qrupuna qatılacaq. Fransa hazırda əvvəlki mərhələdən 5–1 hesablı üstünlük əldə edib və bu nəticə Vembanyama heyətdə olmadığı vaxtda qeydə alınıb. İndi isə o, Parisdə Sloveniya və Stokholmda İsveçlə rəsmi qarşılaşmalarda komandanın əsas silahı olacaq.

Beynəlxalq oyunlardan sonra Vembanyama ABŞ-a qayıdaraq "San Antonio Spörs"ün heyətində NBA mövsümöncəsi hazırlıqlara başlayacaq.