Dünya futbolu ağır itki ilə üzləşib.
Offsideplus.az xəbər verir ki, rumıniyalı əfsanəvi məşqçi Mirça Luçesku 15 dəqiqə əvvəl, 80 yaşında vəfat edib.
Təcrübəli mütəxəssis bir müddət əvvəl keçirdiyi ürək tutmasından sonra xəstəxanaya yerləşdirilmişdi. Həkimlərin səylərinə baxmayaraq, dünya futbolunun ən titullu məşqçilərindən birinin həyatını xilas etmək mümkün olmayıb.
Mirça Luçesku təkcə Rumıniya futbolunun deyil, həm də dünya futbolunun ən parlaq simalarından biri idi. O, karyerası ərzində qazandığı 35-dən çox titulla futbol tarixinə adını qızıl hərflərlə yazdırıb.
Həm "Qalatasaray", həm də "Beşiktaş" klublarını Türkiyə çempionu edib. "Qalatasaray" ilə 2000-ci ildə UEFA Superkubokunu qazanaraq tarixi uğura imza atıb.
Ukrayna təmsilçisi "Şaxtyor Donetsk" klubunda 12 il keçirərək klubu Avropa nəhənginə çevirib və 2009-cu ildə UEFA Kubokunu başı üzərinə qaldırıb.
O, karyerası boyunca "Dinamo Kiyev", "İnter", "Zenit" və "Rapid Buxarest" kimi tanınmış klubları, həmçinin Rumıniya və Türkiyə milli komandalarını çalışdırıb.
