"Sabah" klubunun baş məşqçisi Murad Musayev "Beşiktaş"a qarşı keçirilən xeyriyyə matçından sonra mətbuat konfransına qatılıb.

Offsideplus.az xəbər verir ki, rusiyalı mütəxəssis jurnalistlərin suallarını cavablandırıb.

- Düşünmək olar ki, "Beşiktaş"la matç Konfrans Liqası öncəsi "Sabah" üçün yaxşı təcrübə oldu?

- Belə hesab etmək olar. 30 min azarkeşin qarşısında oynadıq. Əsas odur ki, futbolçularım Vinsent Abubakar və Cenk Tosundan qorxmadı. Qalib də gələ bilərdik. Cəsur oyunumuz xoşuma gəldi.

- Yəqin ki, indi əhval-ruhiyyəniz yaxşıdır. İki saatdan sonra "Qarabağ" çempion olsa, əhval-ruhiyyəniz korlanacaq?

- Xeyr. "Qarabağ" və Qurban Qurbanovu təbrik edəcəm. Onlar buna layiq idilər. Heç nə əhval-ruhiyyəmi korlamaycaq.

- Penaltidən istifadə etsəydiniz, oyun başqa cür gedəcəkdi?

- Məncə, o qədər də dəyişməzdi. Avropada da belə oynamaq istəyirik. "Beşiktaş" cinahları dəyişirdi, qısa ötürmələrlə çıxırdı. Amma qarşısını alırdıq.

- Bu oyun göstərdi ki, "Sabah" avrokuboklara hazırdır. Daha böyük uğurlar üçün nələr etmək lazımdı?

- Çempionatı başa vurandan sonra transferlər haqda düşünəcəyik. Komanda komplektləşəndən sonra nəsə demək olar. Yeni qan lazımdır. Futbolçular Azərbaycana gəlməyi çox da fikirləşmirlər.

- Bu oyundan sonra Aleksey Kaşukun transfer dəyərinin artacağını gözləmək olar?

- Biz onu saxlamaq istəyirik. Amma hər şey bizdən asılı deyil. O, Avropa çempionatına yollanacaq. Necə olacağını görəcəyik.