Voleybol üzrə qadınlar arasında Azərbaycan Yüksək Liqasının 2-ci dövrəsinin oyunları yekunlaşıb.

Offsideplus.az xəbər verir ki, 6-cı tur çərçivəsində “Abşeron” “Murov”la , UNEC isə “Azərreyl”lə üz-üzə gəlib.

Voleybol Mərkəzində təşkil olunan turun ilk matçında “Abşeron” “Murov”la qarşılaşıb. Famil Ağayevin komandası turu qalib başa vurub. “Abşeron” ilk iki hissəni 25:22, 25:19 hesabı ilə öz xeyrinə başa vursa da, üçüncü hissədə 25:17 hesabı ilə sevinən tərəf “Murov” olub. Bununla belə, dördüncü set matçda sonuncu olub. Üçüncü hissədəki məğlubiyyətdən nəticə çıxaran “Abşeron” dördüncü seti hesabına yazdırıb – 25:21.

İkinci dövrənin son matçı UNEC və “Azərreyl” komandaları arasında keçirilib. Bu matçın qalibi isə üç setdə müəyyən olunub. Oyuna daha inamlı başlayan “Azərreyl” birinci setdə 25:13 hesabı ilə qalib gəlib. Eldar Yusubovun komandasının ilk hissədəki uğuru sonrakı setlərdə də davam edib. “Azərreyl” ikinci hissəni 25:10, üçüncü hissəni isə 25:7 hesabı ilə qalib başa vurub.

Beləliklə, iki dövrədən sonra lider “Azərreyl”in 14, “Abşeron”un 12, “Murov”un 10 xalı var. Turnir cədvəlində sonuncu pillədə olan UNEC-in isə xalı yoxdur.

Yüksək Liqa
6-cı tur
9 fevral

“Abşeron” – “Murov” 3:1 (25:22, 25:19, 17:25, 25:21)
UNEC – “Azərreyl” 0:3 (13:25, 10:25, 7:25)