Kobi Uayt hesab edir ki, "Şarlott Hornets" qarşıdakı mövsümdə Şərq Konfransında mövqeyini xeyli yaxşılaşdıra bilər. O, komandanın əsas heyətindən LaMelo Boll və Maylz Bricsin ayrılmasına baxmayaraq, kollektivin potensialına inanır.

Offsideplus.az xəbər verir ki, Uayt açıqlamasında "Düşünürəm, həqiqətən çox yaxşı komandamız var. Heyətimizdə səviyyəli oyunçular toplanıb. Bir çoxumuz komanda üçün oynamağa hazırıq və bu, birləşməyimizi asanlaşdıracaq. Artıq avqust olmasına baxmayaraq, bir çox oyunçu Şarlottdadır və məşqlərə başlayıb. Bu, NBA-də tez-tez rast gəlinən hal deyil və hər bir oyunçunun komandanın uğuruna nə qədər bağlı olduğunu göstərir. Biz birlikdə işləməli, meydançada və ondan kənarda hər gün daha yaxşı olmağa çalışmalıyıq. Komanda daxilində yaxın münasibətlər qurmaq da ən azı meydançadakı qədər vacibdir", – deyə müdafiəçi bildirib.

Qeyd edək ki, "Şarlott Hornets" Uaytı fevralda transfer pəncərəsi bağlanmazdan əvvəl heyətinə qatıb. Yayda isə onunla 3 illik, 74 milyon dollar dəyərində yeni müqavilə imzalanıb. Uayt qarşıdakı mövsümdən böyük gözləntilərinin olduğunu vurğulayıb: "Çox yaxşı komanda olmağa və bir çoxlarını təəccübləndirməyə şansımız var. Bunun üçün isə çox çalışmaq lazımdır. Hazırda məhz bunun üzərində işləyirik".