Rəqabət və həyəcan dolu anlarla yadda qalan "PUBG Mobile" oyunu üzrə Red Bull M.E.O. 2024 finalında MIB (Mübarizlər) eSports komandası üstünlük nümayiş etdirərək 5000 AZN pul mükafatını qazandı.

Offsideplus.az xəbər verir ki, məlumatı turnirin mətbuat xidməti yayıb. 86 xal toplayan komanda rəqiblərini geridə qoyaraq çempion oldu.

Komandanın kapitanı Ümid Orucov, qələbədən danışarkən hazırlıqlarının əhəmiyyətini belə vurğuladı:

"Günlərimizin dörddə birini oyuna sərf edərək, müxtəlif “Mini Cup” və digər turnirlərdə təcrübə qazandıq. Topladığımız təcrübə və komanda olaraq göstərdiyimiz birlik bizə qələbə gətirdi. Rəqabət qabiliyyətimizi və səylərimizi ortaya qoyaraq turnirin qalibi olduq. MIB (Mübarizlər) eSports komandası adından sizə və bütün təşkilatçılara dərin təşəkkürümüzü bildiririk. Belə tədbirlərin mütəmadi olaraq keçirilməsini arzu edirik."

Turnirdə 2-ci yerin sahibi ONYX eSports komandası 60 xalla, 3-cü yerin sahibi isə AGS eSports komandası 53 xalla müəyyənləşdi.

Qeyd edək ki, turnirin əsas tərəfdaşı olan Xiaomi, TOP 3 komandanın hər bir üzvünə xüsusi hədiyyələr təqdim etməklə turnirə dəstəyini göstərdi.