Yannik Sinner bazar günü keçirilən finalda Karlos Alkarası iki setdə məğlub edərək ilk dəfə Monte Karlo "Masters" turnirinin qalibi olub.

Offsideplus.az xəbər verir ki, bu qələbə ilə italyan tennisçi dünya reytinqində birinciliyi ispaniyalı rəqibindən geri alıb.

Sinner Alkaras üzərində 7-6(5), 6-3 hesabı ilə qələbə qazanaraq, ötən ay Indian Wells və Mayamidəki "Sunshine Double" zəfərlərindən sonra ilin üçüncü ATP 1000 titulunu əldə edib.

24 yaşlı Sinner ardıcıl dörd ATP 1000 turnirində (ötən mövsümün sonundakı Paris Masters daxil olmaqla) qalib gələn üçüncü tennisçi kimi Novak Cokovic və Rafael Nadala qoşulub.

İtaliyalı idmançı qalibiyyəti barədə bunları söyləyib:

"Bura qarşıdakı böyük turnirlər öncəsi bacardığımız qədər çox oyun keçirmək və yaxşı təcrübə toplamaq üçün gəlmişdik. Bu gün hər ikimiz yüksək səviyyəli oyun nümayiş etdirdik. Küləkli hava şəraiti işimizi bir az çətinləşdirsə də, nəticə möhtəşəmdir. Yenidən 1 nömrə olmaq mənim üçün çox şey deməkdir. Bu örtükdə (torpaq) ilk dəfə böyük titul qazandığım üçün çox xoşbəxtəm".