Monte-Karlo Masters turniri həlledici mərhələyə qədəm qoyur.
Offsideplus.az xəbər verir ki, finala yüksəlmək üçün dünyanın bir nömrəsi Karlos Alkaras yerli idmançı Valentin Vaşero ilə, Yannik Sinner isə Aleksandr Zverevlə qarşılaşacaq.
Aleksandr Zverev: Turnir ərzində stabil oyun nümayiş etdirərək yarımfinala qədər yüksəlib və dünya reytinqində 3-cü pillədəki mövqeyini möhkəmləndirib. Lakin almaniyalı tennisçi bu mövsüm Karlos Alkaras və Yannik Sinnerə qarşı keçirdiyi bütün yarımfinallarda məğlub olub. O, əvvəllər də Monte-Karloda iki dəfə (2018 və 2022) bu mərhələdə turnirlə vidalaşıb.
Yannik Sinner: Dünya ikincisi olan Sinner rəqibi Feliks Oje-Alyassimi 6-3, 6-4 hesabı ilə məğlub edərək ardıcıl üçüncü dəfə Monte-Karlo yarımfinalına vəsiqə qazanıb. Bu il artıq İndian-Uells və Mayami Masters turnirlərinin qalibi olan italyan tennisçi, Masters səviyyəsində ardıcıl 20 oyunluq qələbə seriyasını davam etdirir.
Sinner aralarındakı rəqabətdə 8-4 hesabı ilə öndədir. Xüsusilə son dövrlərdə üstünlüyü tam ələ alan italyan idmançı, Zverevə qarşı ardıcıl 7 qələbə qazanıb (o cümlədən 2026-cı ildəki hər iki görüşdə).
Karlos Alkaras: Dünya bir nömrəsi 1/4 finalda Aleksandr Bublikə cəmi 3 xal verərək (6-3, 6-0) növbəti mərhələyə yüksəlib. İspaniyalı tennisçi 2025-ci il mövsümünün əvvəlindən bəri torpaq kortlarda keçirdiyi 26 oyunun 25-də qalib gələrək inanılmaz performans nümayiş etdirir. Ötən ilin Monte-Karlo çempionu olan Alkaras bu uğurunu təkrarlamaq niyyətindədir.
Valentin Vaşero: Ev sahibi olan monakolu tennisçi Monte-Karlo Masters turnirində yarımfinala yüksələn ilk yerli idmançı kimi tarixə düşüb. O, Lorentso Muzetti, Hubert Hurkaç və Aleks de Minor kimi güclü rəqibləri mübarizədən kənarlaşdırıb. Son bir ildə böyük sıçrayış edən Vaşero gələn həftə ilk dəfə dünya reytinqində "Top-20"yə daxil olacaq.
Bu, tərəflər arasında keçiriləcək ilk qarşılaşma olacaq. Alkarasın böyük favorit hesab edildiyi bu görüşdə Vaşeronun itirəcəyi heç nə yoxdur.
Qeyd edək ki, Zverev - Sinner görüşü bu gün, Bakı vaxtı ilə saat 15:30-da başlayacaq. Bu qarşılaşma bitəndən sonra isə Alkaras və Vaşero korta çıxacaq.
