Ölkəmizi ilk dəfə Avropa Liqasında təmsil edəcək “Sumqayıt”ın hücumçusu Peyman Babayi komandadan ayrılıb.

Offsideplus.az xəbər verir ki, bunu açıqlamasında İrandan olan, əslən azərbaycanlı futbolçu özü deyib.

Ötən ilin yanvar ayında İranın “Maşınsazi” klubundan 1.5 illiyə icarəyə götürülən hücumçu müqaviləsi başa çatdığı üçün geri dönüb.

25 yaşlı futbolçu əslində Avropa Liqasına vəsiqə qazanan “Sumqayıt”da qalmaq istədiyini, ancaq klubun "Maşınsazi"nin istədiyi məbləği ödəyə bilmədiyi üçün geri qayıtdığını qeyd edib: “Mən indi də istəyirəm ki, “Sumqayıt”da oynayım. Yaxşı baş məşqçimiz var idi. Ayxan Abbasov mənə çox kömək edib. “Sumqayıt”dan heç bir pislik görməmişəm. Biz bir ailə kimi olmuşuq. Əslində mənlik bir şey yoxdur. Avropa Liqasında “Sumqayıt”a köməklik etmək istəyirəm. Mən “Maşınsazi”ni razı saldım ki, “Sumqayıt”da qalım. Sadəcə, müqaviləmin uzadılması üçün “Maşınsazi”nin istədiyi məbləği “Sumqayıt” ödəyə bilmədi. Klublar arasında çoxlu danışıqlar olsa da, maddi tələblər ödənmədiyindən orada qalmağım alınmadı. Ona görə də hazırda Təbrizdəyəm. Ancaq qayıtmağı mən də istəyirəm".

Qeyd edək ki, Peyman Babayi 2019-2020 mövsümündə Premyer Liqamızda 8 qol vuraraq çempionatın şərikli bombardiri olub.(Qol.az)