İngiltərə millisinin baş məşqçisi Tomas Tuxel DÇ-nin yarımfinalında Argentina ilə keçiriləcək prinsipial oyun öncəsi fikirlərini bölüşüb.

Offsideplus.az xəbər verir ki, almaniyalı mütəxəssis komandasının keçmiş tarixdəki rəqabətə deyil, yalnız qarşıdakı oyuna kökləndiyini bildirib:

"Keçmişdə baş verənlərin bu günə aidiyyəti yoxdur. Əlbəttə, oyunçular iki ölkə arasındakı rəqabətin fərqindədirlər. Belə oyunlar futbola çox sayda unudulmaz anlar bəxş edib. Lakin bir məşqçi kimi bizim işimiz təsir edə biləcəyimiz şeylərə — oyuna fokuslanmaqdır. Biz keçmiş hadisələr haqqında danışmırıq, çünki bu qarşılaşma onsuz da özlüyündə kifayət qədər böyük hadisədir. Təzyiq artdıqca işimizi sadələşdirməyə çalışırıq ki, futbolçular tapşırıqları rahat yerinə yetirsinlər. Üzərimdə heç bir tarixi yük hiss etmirəm.

Rəqibin heyətində Lionel Messi kimi ulduz var. Top onun ayağına düşən kimi hərəkətlilik başlayır, Messinin texniki icrası və ötürmələri ən yüksək səviyyədədir. Onunla bağlı diqqət yetirməli olduğumuz çox məqam var, lakin biz meydana öz oyunumuzu və gücümüzü diktə etmək üçün çıxacağıq".

Qeyd edək ki, bu cütün qalibi finalda İspaniya ilə qarşılaşacaq.