“Oyunun keçiriləcəyi Koszalin idman zalında ilk məşqimizə çıxdıq. Polşa ilə oyun zamanı meydanda tətbiq etmək istədiyim bəzi məqamlar var ki, az da olsa onların üzərində işlədik. Düzdür, ilk məşqdə elə də çox vaxtımız olmadı. Çünki bura gəlmək üçün xeyli yol qət etmişik, uşaqlarda yorğunluq var". 

Offsideplus.az Azərbaycan Futzal Federasiyasının saytına istinadən xəbər verir ki, bu sözləri Azərbaycanın futzal millisinin baş məşqçisi Joze Alesio da Silva deyib.

O, yığmamızın DÇ-2024-ün əsas mərhələsində Polşaya qarşı keçirəcəyi oyunun hazırlığından danışıb: "Müdafiədən hücuma çıxmağa, 5-in 4-də oyunla bağlı müəyyən taktiki çalışmalara vaxt ayırdıq. Bəzi futzalçılar məşqdə iştirak edə bilmədilər. Bolinya qrip olub, Felipinyo və Ramiz Çovdarovun isə yüngül zədəsi var. Allahın köməyi ilə onlar Polşa ilə oyunda bizə kömək edəcəklər".

Mütəxəssis qələbə qazanaraq qrupu 1-ci pillədə başa vurmaq istədiklərini də vurğulayıb: "Bilirəm ki, rəqibimiz də bizimlə matça yaxşı hazırlaşır. Hətta onlar tərəfindən verilən müsahibələr, açıqlamalarla da tanışam. Hər dəfə qələbə qazanmaq istədiklərini qeyd edirlər. Onlara hörmətlə yanaşırıq, amma biz də bu qədər yolu qələbə qazanmaq üçün qət etmişik. Oyuna yaxşı hazırlaşmışıq və qrup mərhələsini birinci pillədə başa vurmaq istəyirik".

Qeyd edək ki, Polşa - Azərbaycan görüşü sabah oynanılacaq.