NBA-nin 2026-cı il mövsümöncəsi oyunları davam edir. "Los Anceles Leykers" səfərdə "Sakramento Kinqs" üzərində 127:103 hesablı inamlı qələbə qazanıb. Komandanın əsas fiquru Luka Donçiç olub. Sloveniya millisinin lideri cəmi 16 dəqiqəyə 21 xal toplayıb, 5/12 atış dəqiqliyi ilə oynayıb, üç dəfə üçxallıq zərbə vurub, həmçinin 3 assist, 2 ribaund və 2 top oğurlama ilə yadda qalıb. Donçiç ilk hissədə komandasının hücumuna rəhbərlik etdikdən sonra istirahətə çəkilib.
Offsideplus.az xəbər verir ki, onun gürcüstanlı komanda yoldaşı Sandro Mamukelaşvili də ehtiyatdan oyuna qoşularaq 8 xal, 5 assist, 2 top oğurlama və 1 ribaundla məhsuldar çıxış edib. "Leykers" bir neçə əsas oyunçusunun – Ostin Rivz və Uoker Kesslerin xırda zədələr səbəbindən iştirak etmədiyi qarşılaşmada üstünlüyünü qoruyub saxlayıb.
"Kinqs"də litvalı Domantas Sabonis start heyətində meydana çıxıb və məhdud vaxtda 4 xal, 3 ribaund, 3 assistlə kifayətlənib. Fransa təmsilçisi Maksim Reyno 24 dəqiqəyə 12 xal, 8 ribaund və 2 assist toplayıb. İsrailli Emanuel Şarp isə 30 dəqiqə meydanda qalaraq 7 xal, 2 top oğurlama, 2 assist və 1 ribaundla fərqlənib. Ukrayna və Belarus əsilli amerikalı Aleks Karaban isə 3 xal, 3 ribaund, 2 top oğurlama və 2 assistlə yadda qalıb.
Digər oyunda "Filadelfiya 76ers" "Nyu-York Niks" üzərində 120:97 hesablı qələbə qazanıb. Bu qarşılaşmada Joel Embiid və LeBron Ceyms ehtiyatda qalıb, türkiyəli Adem Bona isə zədə səbəbindən iştirak etməyib. Alman mərkəz oyunçusu Ariel Hukporti oyunun əvvəlində zədə alaraq cəmi 5 dəqiqə meydanda qalıb və bir assistlə kifayətlənib. Fransa təmsilçisi Rayan Rupert 25 dəqiqəyə 6 xal, 4 ribaund və 1 assist toplayıb. "Niks"də britaniyalı OG Anunobi 12 xal, 6 ribaundla fərqlənib, fransalı Məhəmməd Diawara 8 xal, 5 ribaund, həmvətəni Pakom Dadiet isə 5 xal toplayıb.
"Minnesota Timberwolves" isə "Miluoki Baks" üzərində 116:97 hesabı ilə qalib gəlib. Komandanın təcrübəli mərkəz oyunçusu Rudi Qober start heyətində 16 dəqiqəyə 6 xal, 7 ribaund toplayıb. Fransalı ehtiyat oyunçu Joan Beringer isə 15 dəqiqəyə 12 xal, 7 ribaundla yadda qalıb. "Baks"da italiyalı Neit Ament 8 xal, 2 ribaund toplayıb. Gənc fransalı Ousmane Dieng, litvalı Kasparas Yakucionis və serbiyalı Boqolyub Markoviç bu oyunda iştirak etməyib.
