Avropa Liqasının II təsnifat mərhələsi çərçivəsində keçirilən “Qarabağ” – ÇSKA (Sofiya) qarşıdurması qolsuz bərabərliklə başa çatıb – 0:0.
Offsideplus.az xəbər verir ki, matçdan sonra təşkil olunan mətbuat konfransında Sofiya təmsilçisinin baş məşqçisi Xristo Yanev jurnalistlərin suallarını cavablandırıb.
Mətbuat zalına daxil olarkən bolqarıstanlı media nümayəndələri tərəfindən alqışlarla qarşılanan və təbrik edilən mütəxəssis, ilk növbədə qarşılaşmanı dəyərləndirib:
“Çox vacib oyun idi. Futbolçularım meydanda yaxşı mübarizə apardılar. Ailələrinin də izlədiyi bu görüşdə oyunçularımın motivasiyası kifayət qədər yüksək idi. İnanıram ki, cavab matçında da eyni əzm küncündə olacağıq”.
Taktiki gedişlər və komandadakı əhval-ruhiyyəyə toxunan Yanev riskə getmək istemədiklərini bildirib:
“Biz hər bir oyuna fərdi olaraq hazırlaşırıq. Bəzi futbolçularda narazılıqlar var idi, buna görə də risk etmək istəmədik. Cavab oyununa daha yaxşı hazırlaşacağıq”.
Mütəxəssis “Qarabağ”la heç-heçənin onlar üçün uğur sayılıb-sayılmaması ilə bağlı suala cavab verərkən rəqibin gücünü etiraf edib:
“‘Qarabağ’ çox güclü komandadır. Meydanda başqa cür vəziyyət də yarana bilərdi”.
Azarkeş amilinə də toxunan bolqar çalışdırıcı, dolu tribunaların futbolçularına təsir etdiyini gizlətməyib:
“Bizim azarkeşlərimiz yanımızda olmasalar da, dəstəklərini hiss etdirirdilər. Amma rəqib azarkeşlərin tribunaları tam doldurması futbolçularımı müəyyən qədər narahat hiss etdirirdi”.
Sonda matç ərzindəki gərgin reaksiyalarına aydınlıq gətirən Yanev üzr istəməyi də unutmayıb:
“Mən emosional insanam. İşimi çox sevdiyim üçün bəzi anlarda etiraz edərək reaksiya verirəm. Əgər bu kənardan başqa cür görünübsə, buna görə üzr istəyirəm”.
