"Arsenal" klubu keçmiş "Çelsi" futbolçularının transfer müqavilələrindəki xüsusi bəndlərə görə "mavi"lərə böyük məbləğdə əlavə ödənişlər edə bilər.
Offsideplus.az xəbər verir ki, bu ödənişlər London klubunun cari mövsümdəki uğurlarından birbaşa asılıdır.
Məlumata görə, müqavilə şərtləri aşağıdakı kimidir:
- Kay Haverts: Əgər "Arsenal" bu mövsüm Çempionlar Liqasının qalibi olarsa, "Çelsi"yə əlavə 30 milyon funt-sterlinq ödəniləcək.
- Noni Madueke: "Topçular" həm Premyer Liqa, həm də Çempionlar Liqasında zəfər çalaraq "qızıl dubl" edərsə, "Çelsi" daha 20 milyon funt-sterlinq qazanacaq.
- Kepa Arrisabalaqa: "Arsenal" hər iki turnirdə qalib gələcəyi təqdirdə, ispaniyalı qolkiperin transferinə görə əlavə 8 milyon funt-sterlinq ödəniş ediləcək.
Hazırda Mikel Artetanın komandası hər iki cəbhədə iddialı çıxışını davam etdirir. Bu uğurlar "Arsenal" üçün tarixi nailiyyət olsa da, maliyyə baxımından "Çelsi"nin büdcəsinə ümumilikdə 58 milyon funt-sterlinq əlavə vəsaitin daxil olması ilə nəticələnə bilər.
