Azərbaycan milli komandasının baş məşqçisi Fernandu Santuş bu gün bəyanat yayıb.

Offsideplus.az xəbər verir ki, portuqaliyalı mütəxəssis AFFA-nın rəsmi saytı vasitəsilə onu narahat edən 2 məsələyə toxunub.

70 yaşlı çalışdırıcı öncə martın 25-də Belarusla yoldaşlıq görüşüöncəsi yığmanın düşərgəsindən yola salınan qaıçı Şahruddin Məhəmmədəliyev barədə danışıb: "Bu gün mətbuatda yayılmış iki yalan məlumatla tanış oldum. Həmin şayiələri rədd edərək, media nümayəndələri və futbol ictimaiyyəti üçün bu məsələlərə aydınlıq gətirirəm. Milli komandanın toplanışları zamanı futbolçuların fiziki durumu, məşqə və ya oyuna hazır olub-olmamaları ilə bağlı hər gün tibbi heyətdən arayış alıram. Belarus yığması ilə matç üçün tibbi rəydə hazır olmadığı göstərilən yeganə oyunçu Şahrudin Məhəmmədəliyev olub. Qapıçımızla aramızda söhbət baş tutub, bundan sonra o, toplanışdan azad edilib və yerinə Əlirza Müştabazadə dəvət olunub. Ümumiyyətlə, məşqçi karyeram ərzində heç vaxt "oynamağa hazır deyil" diaqnozu qoyulan futbolçunu meydançaya buraxmamışam. Rza Cəfərovun sağlıq durumu qaydasında olduğu üçün meydançaya çıxıb və çox yaxşı təsir bağışlayıb".

F.Santuş, həmçinin Elvin Cəfərquliyev və Şahrudin Məhəmmədəliyevi bir daha milli komandaya çağırmayacağı ilə bağlı yayılan xəbərlərə də münasibət bildirib: "Bunu nə vaxtsa rəsmi və ya şifahi olaraq deməmişəm. Bu barədə yayılan məlumat da həqiqəti əks etdirmir və tamamilə yalandır. Əksinə, adlarını sadaladığım futbolçular bilirlər ki, çağırışlar zamanı həmişə onlara arxalanıram. Elvin haqqında yalnız Haiti ilə oyundan sonra mətbuat konfransı zamanı jurnalistin “Futbolçunu cəzalandıracaqsınızmı?” sualını cavablandırarkən danışmışam. Cavabım isə belə olub: “Səhv etmək insana məxsusdur və buna görə oyunçunu cəzalandırmamalıyıq”. Mən həmişə onlara güvənmişəm və sağlam olduqları müddətdə bunu davam etdirəcəyəm".

Qeyd edək ki, F.Santuş milli komandamızda işlədiyi 9 ay ərzində ilk dəfədir belə bəyanat yayır.