Araşdırmalar nəticəsində “Qarabağ” klubunun mətbuat xidmətinin rəhbəri Nurlan İbrahimovun öz "Facebook" səhifəsində etdiyi paylaşımı Ermənistan tərəfindən Azərbaycanın Gəncə, Bərdə və digər şəhərlərinə atılan ballistik raket zərbələri nəticəsində mülki şəxslərin, o cümlədən neçə-neçə günahsız körpələrin, eləcə də, yeniyetmə futbolçu Şəhriyar Qurbanovun amansızcasına qətlə yetirilməsi, bu görüntüləri sosial şəbəkədə izləyərkən stresə düşməsi və həmin anın emisonallığına qapılaraq etməsi aydın olub. Qəddarlığa və ədalətsizliyə qarşı öz hisslərini cilovlaya bilməyən Nurlan İbrahimovun öz Facebook səhifəsində təcavüzkar ölkənin millətinə qarşı dövlətimizin mövqeyinə və təmsil etdiyi klubun prinsiplərinə zidd olan sözlərdən istifadə etməsini düzgün hesab etmirik.

N.İbrahimovun Facebook səhifəsində etdiyi paylaşımın doğru olmadığını tez bir zamanda etiraf edərək silməsi də öz səhvini və məsuliyyətini dərindən başa düşməsi ilə əlaqədardır.

Düşünürük ki, Nurlan İbrahimovun futboldan ömürlük uzaqlaşdırılması ona verilən çox ağır cəzadır. Bəşəryyətin ülvi məqsədlər ətrafında birləşməsinə təkan verən, insanları bir-birinə yaxınlaşdıran, onların hisslərinə nüfuz edən çox təsirli vasitə olan idman Nurlan İbrahimovun da həyatının ayrılmaz hissəsinə çevrilib. O, da yüz minlərlə futbolsevər kimi gələcəkdə də bu idman növünün inkişafına öz töhfələrini vermək arzusundadır. Sizə müraciətlə xahiş edirik ki, N.İbrahimovun cəzalandırılması ilə bağlı qərara yenidən baxılsın.