İtaliyalı mütəxəssis Stefano Pioli Kriştiano Ronaldu ilə işləmək təcrübəsindən söz açıb.

Offsideplus.az xəbər verir ki, "Milan" və "Əl-Nəsr"in sabiq baş məşqçisi Səudiyyə Ərəbistanına getdiyinə görə peşman olmadığını bildirib. O qeyd edib ki, "Milan"dan sonra xaricdə işləmək istəyi, maliyyə amili və Kriştiano Ronaldu ilə işləmək imkanı onun qərarına təsir edib.

"Əgər sən onu məşq etdirmirsənsə, onun nə qədər böyük olduğunu başa düşmürsən. O, qollar vurmaq ideyası ilə yaşayan bir çempiondur. Özünü çox hörmətlə aparır. Kriştiano və Zlatan İbrahimoviçin insanlarla münasibətdə oxşar cəhətləri var: 'Əgər sən mənə qarşı səmimisənsə, mən də sənə hörmət edirəm. Əgər səmimi deyilsənsə, problem yaranır'. Mən həmişə münasibətlərimizi aydınlıq və səmimiyyət üzərində qurmuşam. Təbii ki, söhbət Zlatan və Kriştianodan gedirsə, onlara 'Sabah oynamayacaqsan' və ya 'Sabah 60 dəqiqə meydanda olacaqsan' deyib, sözünü tutmaq vacibdir. Bir dəfə tələskənlikdən Zlatana bunu əvvəlcədən deməmişdim. Düşünürəm, bu, COVID-19 pandemiyası dövründə, hər üç gündən bir oyun keçirdiyimiz vaxt idi. Birinci hissənin sonunda hesab 0:0 idi, sonrakı on dəqiqədə iki-üç qol vurduq. Mən üç əvəzetmə etdim: Zlatan, Hakan Çalhanoğlu və daha bir oyunçu, amma Zlatana əvvəlcədən xəbər verməmişdim. Ertəsi gün Zlatan mənə yaxınlaşdı... Onun yaxşı cəhəti odur ki, vəziyyəti arxada qoyduqdan sonra ertəsi gün elə davranır ki, guya heç nə baş verməyib".