İngiltərə Futbol Assosiasiyasının (FA) bu gün dərc etdiyi illik hesabata əsasən, Londonun "Çelsi" klubu 2025-ci ilin fevralından 2026-cı ilin fevralınadək olan dövrdə vasitəçilərə ən çox vəsait xərcləyən Premyer Liqa klubu olub.
Offsideplus.az xəbər verir ki, "zadəganlar" 4 fevral 2025-ci il və 2 fevral 2026-cı il tarixləri arasında futbolçu agentlərinə ümumilikdə 65.1 milyon funt-sterlinq ödəyib.
"Çelsi" bu göstərici ilə ən yaxın izləyicisi olan "Aston Villa"nı iki dəfəyə yaxın qabaqlayıb. Premyer Liqanın digər böyük klubları ilə müqayisə belədir:
"Çelsi": £65.1 milyon
"Aston Villa": £38.4 milyon
"Mançester Siti": £37 milyon
"Liverpul": £34 milyon
"Arsenal": £32.1 milyon
Klub daxilindəki mənbələr bu yüksək rəqəmi keçən yay transfer pəncərəsində həyata keçirilən rekord səviyyəli oyunçu satışları ilə əlaqələndirirlər. Belə ki, Premyer Liqa qaydalarına görə, klublar futbolçunu satarkən də agentlərə müəyyən komissiya ödəyirlər. "Çelsi"nin həmin dövrdə təxminən 300 milyon funt-sterlinq dəyərində oyunçu satışı reallaşdırdığı bildirilir.
Maraqlıdır ki, agent haqları ilə bağlı hesabatın çıxdığı eyni gündə "Çelsi" 2025-ci ilin iyununa qədər olan maliyyə ili üçün 262.4 milyon funt-sterlinq həcmində rekord vergiöncəsi zərər etdiyini açıqlayıb. Bu, Premyer Liqa tarixində bir klub tərəfindən qeydə alınan ən yüksək illik itkidir.
Buna baxmayaraq, klub rəhbərliyi Premyer Liqanın Rentabellilik və Dayanıqlılıq Qaydalarına (PSR) tam əməl etdiklərini və heç bir xal silinməsi təhlükəsi ilə üzləşmədiklərini vurğulayır.
