Misli Premyer Liqasının XXVIII turunda “Şamaxı”nı 3:0 hesabı ilə məğlub edən “Zirə” əlamətdar göstəricini rəsmiləşdirib.

Offsideplus.az PFL-in rəsmi saytına istinadən xəbər verir ki, dünən Zirədəki 3:0 hesabı Azərbaycan çempionatları tarixində 400-cü dəfə qeydə alınıb.

Yarışda ilk dəfə bu hesab təxminən 33 il öncə olub. 1992-ci il mayın 3-də “Pambıqçı” (Bərdə) “Şirvan”a (Kürdəmir) 3 cavabsız qolla qalib gəlib.

Azərbaycan çempionatlarında indiyədək "Qarabağ" hamıdan çox 3:0 hesablı qələbə qazanıb - 65 dəfə. Bu siyahıda ikinci “Neftçi” (41), üçüncü isə "Kəpəz” (31) dayanır. 

Maraqlıdır ki, "Kəpəz" eyni zamanda 0:3 hesablı məğlubiyyəti ən çox yaşayan klubdur - 27 dəfə. MOİK 25, “Qəbələ” isə 22 dəfə bu hesaba üzülüb.