Boks dünyasının illərdir böyük həyəcanla gözlədiyi an gəlib çatdı.
Offsideplus.az xəbər verir ki, ağır çəki dərəcəsində iki Britaniya nəhəngi — Entoni Coşua və Tayson Füri nəhayət rinqdə üz-üzə gələcək.
Coşuanın promouteri Eddi Hirn sosial media hesabında "İmzalandı, möhürləndi və təslim edildi! AJ vs Füri baş tutur!" yazaraq bu xəbəri rəsmən elan edib. Hirn bu razılaşmanı "indiyədək imza atdığımız ən böyük iş, lakin daha da önəmlisi, hər zaman reallaşmasını istədiyimiz tək döyüş" kimi xarakterizə edib.
Nüfuzlu "The Ring" jurnalı bazar ertəsi etdiyi paylaşımda tərəflər arasında hər şeyin razılaşdırıldığını ("done deal") və qarşıdurmanın 2026-cı ilin 4-cü rübündə baş tutacağını bildirib. Tayson Füri bu tarixi döyüşü artıq "Britaniya döyüşü" (The Battle of Britain) adlandırıb.
36 yaşlı Coşua və 37 yaşlı Füri on ilə yaxındır ki, bir-birləri ilə qarşılaşmaq üçün müzakirələr aparsalar da, müxtəlif səbəblərdən bu döyüş indiyədək baş tutmamışdı. Britaniya boks tarixinə damğa vuran bu iki ad, nəhayət karyeralarının ən böyük sınağına çıxacaqlar.
Noyabr ayında keçirilməsi hədəflənən bu böyük döyüşdən əvvəl Coşua rinqə qayıdışını reallaşdıracaq:
25 iyul tarixində Coşua Səudiyyə Ərəbistanının paytaxtı Riyad şəhərində alban boksçu Kristian Prenqa ilə qarşılaşacaq.
Bu döyüş Füri ilə keçiriləcək böyük final öncəsi son sınaq olacaq.
Azarkeşlər bu möhtəşəm qarşılaşmanı Netflix platforması vasitəsilə canlı izləyə biləcəklər. Döyüşün Britaniya stadionlarından birində keçiriləcəyi gözlənilsə də, promouter Eddi Hirn hələlik dəqiq məkan və tarixi açıqlamayıb.
"AJ-in karyerasının ən böyük ili gəlir, geri qayıdış başlayır," — deyə Eddi Hirn vurğulayıb.
