"Səbail" futbol komandasının məşqçisi Vüqar Məmməd 20 oyunluq cəzalanıb.

Offsideplus.az xəbər verir ki, AFFA-nın İntizam Komitəsinin bugünkü iclasında bununla bağlı qərar qəbul edilib. Səbəb kimi gənc mütəxəssisin Azərbaycan Kubokunun 1/4 final mərhələsinin “Sumqayıt”la cavab görüşünün 76-cı dəqiqəsində köməkçi hakim Cavanşir Yusifovu vurması göstərilib.

Faktla əlaqədar Azərbaycanın U-19 və U-17 millillərinin keçmiş baş məşqçisi uzunmüddətli diskvalifikasiyaya məruz qalıb, "Səbail"ə 16 000 manat cərimə kəsilib.

Bu oyunda 4 futbolçusu sarı vərəqə ilə cəzalanan “Sumqayıt” klubu isə 800 manat ziyana düşüb.

Qeyd edək ki, oyun "Sumqayıt"ın 2:1 hesablı qələbəsi ilə yekunlaşıb. İlk matçda "Səbail" 1:0 hesabı ilə qalib gəlsə də, səfərdə az qol vurduğu üçün mübarizəni dayandırıb.