Buss qardaşları noyabrın əvvəlindən etibarən "ASVEL" klubunu Toni Parker-dən almaq üçün eksklüziv danışıqlar hüququ əldə edib.

Offsideplus.az xəbər verir ki, Coey və Cessi Buss qardaşları "ASVEL"in səhmlərini almaq üçün yeganə hüquqa malikdir. Qeyd edək ki, "ASVEL" EuroLeague-in 13 səhmdar klubundan biridir və yaxın vaxtlarda françayz sisteminə keçid planlaşdırılır. EuroLeague ilə NBA arasında mümkün əməkdaşlıq da danışıqlara təsir edən əsas amillərdəndir. Avropa basketbolunun dəyərinin aşağı qiymətləndirilməsi fonunda, investorlar üçün klubları nisbətən ucuz qiymətə almaq üçün əlverişli şərait yaranıb.

"ASVEL" bu mövsüm EuroLeague-də böyük ambisiyalarla çıxış etsə də, klubun planlaşdırılan 59 milyon avroluq büdcəsi ölkənin maliyyə qurumları tərəfindən təsdiqlənməyib və büdcə 24 milyon avroya endirilib. Nəticədə, klub ulduz oyunçusu Silven Fransiskonu "Panatinaikos"a, Daniel Teysi isə "Makabi Təl-Əviv"ə göndərməli olub. Bundan əlavə, Armani Brooks və Nik Veyler-Babb müvafiq olaraq "Valensiya" və "Srvena Zvezda"ya icarəyə verilib.