İtaliya millisinin 2026-cı il Dünya Çempionatına vəsiqə qazana bilməməsinin şoku yaşanarkən, "Milan" klubunun keçmiş gənc oyunçusu Federiko Manciameli ölkə futbolunu sarsıdan açıqlamalar verib.
Offsideplus.az xəbər verir ki, "Milan"ın U-17 və U-19 komandalarında çıxış etdikdən sonra erkən yaşda karyerasını bitirən Manciameli onu futboldan uzaqlaşmağa məcbur edən "zəhərli sistemi" bütün çılpaqlığı ilə ifşa edib:
- Rüşvət mexanizmi: Agentlərin aşağı dəstə oyunçularını "Seriya C" klublarına yerləşdirmək üçün 50.000 avroya qədər rüşvət ödəməsi;
- Legioner problemi: "Seriya A" və gənclər komandalarının yüksək maaşlı xarici oyunçuların hegemonluğu altına keçməsi;
- Məşqçilərin çarəsizliyi: Baş məşqçilərin hətta əsas heyəti seçmək səlahiyyətindən məhrum edilməsi;
- Hörmətsizlik: Klub rəsmilərinin futbolçulara və texniki heyətə qarşı tamamilə hörmətsiz davranışı;
- Sistemli çürümə: Geniş yayılmış qohumbazlıq, saxtalaşdırılmış faktlar və pərdəarxası "çirkinliklər".
Manciameli bütün bu sistemin kökündən çürüdüyünü bildirib. O, verdiyi bəyanatda həm məyusluğunu, həm də canını qurtardığı üçün rahatlıq tapdığını vurğulayıb:
"Heç vaxt nümunə götürülməməli olan bu zəhərli mühitdən qaçdığım üçün həm hiddətli, həm də rahatam."
