"Atletiko Madrid" klubu "Sportinq"in kapitanı və danimarkalı yarımmüdafiəçi Morten Yulmandın transferi istiqamətində əhəmiyyətli irəliləyiş əldə edib.
Offsideplus.az xəbər verir ki, Madrid təmsilçisi 27 yaşlı futbolçu ilə 2031-ci ilin yayına qədər nəzərdə tutulan müqavilənin şəxsi şərtləri barədə tam razılığa gəlib.
Danimarkalı oyunçu Dieqo Simeonenin komandasına qoşulmağa artıq yaşıl işıq yandırıb. İndi isə klublar arasında transferin maliyyə detallarını həll etmək üçün danışıqlar davam edir.
"Atletiko Madrid"in ilkin 35 milyon avroluq (30 milyon nağd + 5 milyon bonus) təklifi "Sportinq"in prezidenti Frederiko Varandas tərəfindən geri çevrilsə də, İspaniya nəhəngi transferi bitirmək üçün təklifini yeniləməyə hazırlaşır. Portuqaliya klubu kapitanı üçün ən azı 40-50 milyon avro civarında sabit bir məbləğ tələb edir.
Tərəflərin yaxın günlərdə ortaq məxrəcə gələcəyi gözlənilir.
