“Barselona” klubu Joao Kanselonun Səudiyyə Ərəbistanının “Əl-Hilal” klubundan mövsümün sonuna qədər icarəyə alındığını rəsmən təsdiqləyib.

Offsideplus.az xəbər verir ki, razılaşmaya əsasən, Kataloniya təmsilçisi futbolçunun maaşının 4 milyon avroluq hissəsini qarşılayacaq. Portuqaliyalı müdafiəçi “Barselona”da 2 nömrəli forma ilə çıxış edəcək.

Müqavilənin imzalanma mərasimi çərşənbə axşamı klubun ofisində baş tutub. Tədbirdə “Barselona” prezidenti Laporta, birinci vitse-prezident Rafael Yuste, idarə heyətinin üzvü Xoan Soler, futbol şöbəsinin direktoru Anderson Luis de Souza (Deko), eləcə də futbolçunun ailə üzvləri iştirak ediblər.

Joao Kanselo daha əvvəl 2023/24 mövsümündə “Barselona”da icarə əsasında çıxış edib. Həmin mövsümdə o, bütün turnirlərdə 42 oyuna çıxaraq 4 qol vurub və 5 məhsuldar ötürmə edib. İcarə müddəti başa çatdıqdan sonra, 30 iyun 2024-cü ildə “Əl-Hilal”a transfer olunan Kanselo burada bir mövsüm yarım ərzində 45 matçda forma geyinib.

Karyerasına Portuqaliyanın Barreiro şəhərində başlayan Kanselo “Benfika”nın yetirməsidir. O, Lissabon klubunda Portuqaliya çempionluğu, ölkə kuboku, Liqa kuboku və Superkubok qazanıb. Daha sonra “Valensiya”, “İnter”, “Yuventus” və “Mançester Siti” kimi klublarda çıxış edən müdafiəçi, həmçinin “Bayern Münhen” və yenidən “Barselona”da icarə əsasında oynayıb.

Beləliklə, Joao Kanselo ikinci dəfə “Barselona” formasını geyinərək mövsümün qalan hissəsində komandanın müdafiə xəttini gücləndirəcək.