​İngiltərə Futbol Assosiasiyası (FA) "Çelsi" klubunun vingeri Mixaylo Mudrik barəsində şok qərar qəbul edib.

Offsideplus.az xəbər verir ki, 25 yaşlı futbolçu antidopinq qaydalarını pozduğuna görə 4 il müddətinə yaşıl meydanlardan kənarlaşdırılıb.

​Məlumata görə, Mudrikin 2024-cü ilin sonunda verdiyi test analizlərində qadağan olunmuş meldonium maddəsi aşkarlanıb. Futbolçu həmin vaxtdan bəri müvəqqəti olaraq oyunlardan uzaqlaşdırılsa da, FA-nın apardığı uzunmüddətli araşdırma nəticəsində ona maksimum cəza verilməsi qərara alınıb.

​Ukraynalı futbolçu bu qərarla razılaşmayaraq Lozannadakı İdman Arbitraj Məhkəməsinə (CAS) apellyasiya şikayəti təqdim edib. CAS artıq şikayətin daxil olduğunu və tərəflərin yazılı bəyanatlarının toplandığını təsdiqləyib.

​"Bu mənim üçün tam şok oldu. Mən heç vaxt bilərəkdən qadağan olunmuş maddələrdən istifadə etməmişəm və günahsızlığımı sübut etmək üçün sonadək mübarizə aparacağam." 

​Hazırda "Çelsi" rəsmi şərh verməkdən imtina edib. Mudrikin hüquq müdafiəçiləri cəzanın minimuma endirilməsinə və ya tamamilə ləğvinə çalışırlar.

Xatırladaq ki, Mudrik 2023-cü ildə "Şaxtyor Donetsk" klubundan London təmsilçisinə böyük ümidlərlə transfer olunmuşdu.