İstanbulun "Qalatasaray" klubu Portuqaliya milli komandasında dünya ulduzu Kriştiano Ronaldu ilə çiyin-çiyinə oynayan Joao Feliksi transfer etmək istəyir.

Offsideplus.az xəbər verir ki, transfer hüquqları "Çelsi"yə məxsus olan 25 yaşlı hücumçu bu ilin fevralın 3-dən bəri icarə əsasında "Milan"da çıxış edir.

Ancaq istedadlı futbolçu yeni komandasından və durumundan razı görünmür. O, arxada qalan təxminən 2 aylıq zaman kəsiyində 11 qarşılaşmada forma geyinib və cəmi 1 qol vurub. Transfer dəyəri 25 milyon avro dəyərləndirilən Joao Feliksin mövsümün sonunda "Milan"dan ayrılacağı gözlənilir.

Onun "Çelsi" ilə müqaviləsi 2031-ci ilə qədərdir. İtaliya mətbuatının yazdığına görə, portuqaliyalıya "Qalatasaray"dan başqa Səudiyyə Ərəbistanının da 2 klubu maraq göstərir.

"Cim Bom" rəhbərliyi Viktor Osimhenin yayda mümkün gedişini, eləcə də Alvaro Moratanın taleyinin hələ də müəyyənləşmədiyini nəzərə alaraq, ön xətti gücləndirməyi vacib sayır. Bu baxımdan Joao Feliksin transferi heyətdə yaranacaq boşluğu doldurmağa kömək edəcək.