"Fənərbağça"da gözlənilən "zəlzələ" baş verdi: Həm texniki heyət, həm də rəhbərlik səviyyəsində köklü dəyişikliklər üçün düyməyə basıldı.

Offsideplus.az xəbər verir ki, aprelin 27-də (2026) "Qalatasaray"a qarşı alınan ağır derbi məğlubiyyətindən (0-3) cəmi bir gün sonra klub daxilində bütün daşlar yerindən oynadı.

İstanbul təmsilçisi rəsmən elan etdi ki, baş məşqçi Domeniko Tedesko və onun köməkçiləri ilə yollar ayrılıb. Lakin ayrılıqlar bununla bitmir; klubun idarəetmə strukturunda da ciddi ixtisarlar baş verib.

İdman direktoru Devin Özek və futbol koordinatoru Berke Çelebi ilə də müqavilələr ləğv edilib. Klub bu şəxslərə göstərdiyi xidmətlərə görə təşəkkür edib. Mövsümün qalan hissəsində (cəmi bir neçə oyun qalmış) komandanı meydana köməkçi məşqçi Zeki Murat Göle çıxaracaq.

Ən çox səs küy yaradan xəbər isə rəhbərliyin fəaliyyətinə son qoyması oldu. Məşhur insayder Yağız Sabuncuoğlunun verdiyi məlumata görə, "Fənərbağça" idarə heyəti növbədənkənar seçimli ümumi yığıncaq (seçki) keçirmək qərarı alıb.

Hazırkı prezident Səddetin Saran hələlik namizədliyi ilə bağlı son qərarını verməyib. Halbuki o, cəmi bir neçə həftə əvvəl (3 aprel) "2027-ci ilə qədər qalmağı haqq etdik" deyərək iddialı danışmışdı.

Klub daxilində gərginlik pik həddə olsa da, hələlik rəsmi olaraq prezidentliyə namizədliyini irəli sürən şəxs çıxmayıb. Yaxın günlərdə keçmiş prezident Əli Koçun və ya digər güclü fiqurların hərəkətə keçəcəyi gözlənilir.

Xatırladaq ki, "Qalatasaray" derbisində qapıçı Edersonun VAR monitorunu yumruqlayaraq sındırması və komandanın meydandakı ruhsuz oyunu camiədə böyük bir qəzəb dalğası yaratmışdı. Bu qərarlar azarkeşlərin və konqres üzvlərinin təzyiqi altında "imperiyanı xilas etmək" cəhdi kimi qiymətləndirilir.

"Fənərbağça" üçün aprel ayının bu son günləri klub tarixinin ən kritik dönəmlərindən biri kimi yadda qalacaq.