"Fənərbağça"nın adı gələcək yay transfer dövründə tez-tez "Yuventus"un hücumçusu Duşan Vlahoviçlə hallanır. Bu mövzuda sensasiyalı iddia ortaya atılıb.

Offsideplus.az xəbər verir ki, İngiltərənin Premyer Liqa klublarından biri olan "Aston Villa", Con Duranın qış transferində 65 milyon avroya "Əl-Nəsr"ə keçməsindən sonra hücumçu axtarışlarını davam etdirir və serbiyalı forvardı transfer etmək üçün 60 milyon avro büdcə ayırıb.

İngiltərə təmsilçisinin baş məşqçisi Unay Emeri bu transferi israrla istəyir və klub rəhbərliyi də buna ciddi büdcə ayırmağa hazırdır. Lakin "Aston Villa" gələn mövsümdə Çempionlar Liqasında iştirak etməyə bilər. Bu halda, Vlahoviç digər klublara üstünlük verə bilər.

Qeyd edək ki, 25 yaşlı hücumçu bu mövsüm "Yuventus" forması ilə 32 matçda 14 qol vurub və 2 məhsuldar ötürmə edib.