Azərbaycan Respublikasının Prezidenti İlham Əliyev qələbə münasibətilə "Qarabağ"ı təbrik edib.

Offsideplus.az xəbər verir ki, o, rəsmi sosial media hesabında paylaşım edib. Prezident təbrikində bunları yazıb:

"Qitənin ən nüfuzlu klub turnirində - Çempionlar Liqasının əsas mərhələsində ilk qələbəsini qazanması münasibətilə Ağdamın "Qarabağ" futbol klubunu ürəkdən təbrik edirəm. Bu, Azərbaycan futbolunun, Azərbaycan idmanının tarixi zəfəridir.

"Qarabağ"ın Avropanın köklü klublarından biri olan "Benfika" ilə səfər matçında oyunun gedişində möhtəşəm geridönüş edərək parlaq qələbə çalması onun məğlubedilməz ruhunu, mübarizə əzmini göstərir.

Bu qələbə ilə doğma komandamız Azərbaycan xalqına böyük sevinc bəxş etmişdir. Hər bir azərbaycanlı Avropada xariqələr yaradan "Qarabağ"la qürur duyur.

Komandamıza Çempionlar Liqasının növbəti oyunlarında uğurlar və yeni-yeni zəfərlər arzu edirəm".

Qeyd edək ki, Çempionlar Liqasının əsas mərhələsində mübarizə aparan "Qarabağ" Lissabonda "Benfika"nı məğlub etməyi bacarıb - 3:2.