"Kəpəz"in kapitanı Tural Axundov Misli Premyer Liqasının I turunda "Zirə"yə qarşı oyun (1:2) barədə fikirlərini bölüşüb.

Offsideplus.az klubun rəsmi saytına istinadən xəbər verir ki, 34 yaşlı futbolçu  çempionatda ilk oyunların həmişə çətin olduğunu bildirib.

“Sevindirici məqamdır ki, “Kəpəz” yenidən futbolumuzun elitasında çıxış etməyə başladı. Bunun daimi olması arzulanandır. Komanda həmişə yaxşı yerlərdə mübarizə aparsın. Oyun yaxşı alındı. Qələbə də qazana bilərdik, heç-heçənin olması da mümkün idi. Çalışacağıq ki, növbəti görüşlərdə qələbə qazanıb azarkeşlərimizi sevindirək. Nəticələrimizin yaxşı olması üçün maksimum şəkildə bacarığımızı ortaya qoyacağıq”.

“Zirə”yə qarşı matçda “Kəpəz” komandanı məğlubiyyətə aparan qolu oyunun son anlarında buraxıb. Kapitan azlıqda qalan rəqiblə görüşdə hesabı qorumağa nəyin mane olduğunu belə izah edib: “Çox çalışdıq ki, sərfəli nəticə qazanaq. Hesab 1:1 olanda qol da vurduq. Amma vəziyyət ofsayd hesab olunduğundan qeydə alınmadı. Hesab başqa cür də ola bilərdi. Komanda yeni yığılıb. Əslində qələbə qazanmaq üçün alışıb-yanırdıq. Ona görə də irəli atıldıq, amma öz qapımızdan qol buraxdıq. Çox məyus olmuşduq. Bu, bizə dərs oldu. Çatışmayan cəhətlərimizin üzərində çalışıb nöqsanları aradan qaldıracağıq. Baş məşqçimiz də kimin hansı səviyyədə olduğunu gördü. Zəif yerlərimizi gücləndirməliyik. Hamımız əl-ələ verib bir olmalı və komanda olaraq daha yaxşı şəkildə mübarizə aparmalıyıq”.

Beş ildən sonra “Kəpəz”i kapitan kimi meydana çıxaran Tural Axundov bu haqda da danışıb: “Kapitanlıq əlavə məsuliyyət deməkdir. Həm meydanda, həm də ondan kənarda. Kapitan hər yerdə ən yaxşı tərəfdən özünü göstərməlidir. Sarğı qolumda olduğu üçün oyunda yaxşı hisslər keçirdim. Mənə etimad göstərən klub rəhbərliyinə, məşqçilərə minnətdarlığımı bildirirəm. Çalışacağam ki, kapitanlığın haqqını verim.”