"Səbail" klubunun baş məşqçisi Aftandil Hacıyev Premyer Liqamızın 6-cı turunda "Neftçi"yə 1:3 hesabıyla uduzduqları oyundan sonra təşkil olunan mətbuat konfransına qatılıb.

Offsideplus.az xəbər verir ki, 40 yaşlı mütəxəssis matçla bağlı bunları deyib:

"Oyuna yaxşı əhval-ruhiyyədə hazırlaşmışdıq. Rahid Əmirquliyevin rekord vurması hamımızı sevindirirdi. Rəqib bizi topa sahib olmada üstələdi. Buraxdığımız kuryoz qoldan sonra oyunçularda inamsızlıq yarandı".

O, ardıcıl neçə oyundur ki, ilk qolu qapılarında gördüklərini bildirib:

"Belə olan halda yenidən toparlanmaq çətindir. Fasiləyə yaxın ikinci qolu buraxdıq. Məndə inam var idi ki, rəqibin qapısında bir neçə qol epizodu yarada biləcəyik. 0:3 geridə olsaq da, son dəqiqədə bir qol vura bildik. "Neftçi"yə qarşı oyunda geridönüş etmək çətindir. Sadəcə, meydanda keyfiyyətdə fərq var idi. Bəlkə də cari mövsüm "Neftçi"nin qapısında bu qədər qol epizodu yaradan ikinci komanda yoxdur. Rəqibə uğurlar arzulayıram, layiqli qələbə qazandı. Rəqiblərin imkanları ilə müqayisə aparsaq, autsayderik. Biz hələ çox xallar qazanacağıq. Bu komandanın potensialı var. Heyətə gec qoşulan legionerlər oldu. Bəziləri bizimlə təlim-məşq toplanışına belə qatılmayıb. Legionerlərdən faydalanmaq üçün bizə vaxt lazımdır. Futbolçular üçün də çətindir, fərqli ölkəyə gəliblər. Onlara uyğunlaşmaq üçün vaxt lazım olacaq".