“Neftçi” klubunun baş məşqçisi Samir Abasov Azərbaycan Premyer Liqasının 20-ci turu çərçivəsində “Səbail”ə qarşı keçirdikləri oyundan (4:0) sonra mətbuat konfransına qatılıb.

Offsideplus.az xəbər verir ki, 43 yaşlı mütəxəssis böyük hesabla qalib gəldikləri matç barədə bunları deyib:

“Hər iki komanda matça itkilərlə çıxmışdı. Bizdə Emin Mahmudovun yoxluğu hiss olundu. Bəzi məqamlarda çətinliyimiz oldu. Şükürlər olsun, qalib gəldik. Fasiləyə yaxşı əhval-ruhiyyə ilə yollanırıq. Düzdür, milli komandalara gedən futbolçulara görə əziyyət çəkəcəyik. İnanırıq ki, problem olmayacaq. Əsas milliyə neçə nəfərin getdiyini bilmirik. Bu, məşqlərimizə 100 faiz təsir edəcək. Hazırda Fəhmin Muradbəyli zədəlidir. Həkimlər çox əlləşir. Məşqdə bəladan qurtardı. Ayağı sına bilərdi. Ahmed Ahmedovun əzələsində dartılma var. İnanırıq ki, fasilədə hər ikisi sıraya qayıdacaq”.

Abasov yeni transfer Keysuke Hondanın məşqə çıxdığını bildirib:

“Fərdi məşqçisi ilə individual olaraq məşq edir. 3 gündən sonra komanda ilə hazırlıqda iştirak edəcək. Fiziki durumu ilə bağlı nəsə demək çətindir. Fasilədə yoxlama oyunu keçirmək istəyirik. Orada Hondanın durumunu daha yaxşı görəcəyik”.

O, komandanın motivasiyalı oynamasının Hondanın gəlişi ilə bağlı olmadığın deyib:

 “Əksinə ilk hissədə çox top itirdik. Məncə, elə də yaxşı oynamadıq. Sadəcə, bu oyunda qələbə çox önəmli idi”.