İngiltərə Futbol Liqası (EFL) və Şotlandiya Peşəkar Futbol Liqası (SPFL) bu mövsüm oyunlarının Rusiyada televiziya vasitəsilə yayımlanması ilə bağlı araşdırmaya başlayıb və məhkəməyə müraciət etməyi nəzərdən keçirir.

Offsideplus.az xəbər verir ki, Rusiya kanalı "Futbol" EFL-in ilk iki turunun, həmçinin Şotlandiya liqasının "Seltik", "Reyncers" və "Harts"ın iştirakı ilə keçirilən oyunlarını yayımlayıb. EFL və SPFL 2022-ci ildən etibarən Rusiyada yayımı dayandırıb və bu ölkəyə yayım hüquqları satmayıb. Buna görə də, oyunların birbaşa yayımlarının qanunsuz əldə olunub yayımlandığı ehtimal edilir.

EFL ötən həftə "Futbol" kanalı ilə əlaqə saxlayıb. Buna səbəb "Kardiff" – "Rekshem" (1:1) və "Uotford" – "Sauthempton" (2:1) oyunları da daxil olmaqla bir neçə qarşılaşmanın Rusiyada göstərilməsi olub. Şikayətə baxmayaraq, telekanal ötən həftəsonu "Vest Hem" – "Çarlton" (1:2) və "Vest Bromviç" – "Bernli" (3:1) oyunlarının da birbaşa yayımını həyata keçirib. Bu qarşılaşmalar test tədbiri kimi təqdim olunub və bu, "Futbol" kanalının gələcəkdə Premyer Liqadan da qanunsuz yayımlar planlaşdırması ilə bağlı narahatlıq yaradıb.

Bundan əlavə, Şotlandiya liqasının oyunlarının yayımları "Futbol" kanalının teleqram səhifəsində də təbliğ edilib. Hər iki təşkilat kanal və ona oyunlara çıxış imkanı verən bütün tərəfləri məhkəməyə vermək hüququnu özündə saxlayır. SPFL-dəki mənbə liqanın bu məsələni yayım hüquqlarının sahibi Infront ilə birgə araşdırdığını bildirib.