Portuqaliya millisinin sabiq yarımmüdafiəçisi Luis Fiqu FIFA prezidenti Canni İnfantinonun vəzifəsini tərk etməli olduğunu bildirib.

Offsideplus.az xəbər verir ki, FİFA-nın Dünya Çempionatının yayım hüquqlarını özəl investorlar üçün satışa çıxarmaq məqsədilə yeni kommersiya qurumu yaratmaq planı futbol ictimaiyyətində ciddi narazılıq doğurub. Fiqu bu təşəbbüsə sərt reaksiya verib və İnfantinonun davranışını kəskin tənqid edib.

"FİFA-nın problemləri barədə 10 min söz yaza bilərəm. Amma həll sadədir: İnfantino getməlidir. Mən həyatı boyu futbolu sevmişəm, 20 il peşəkar futbolçu olmuşam. Karyeramda çoxlu mənfi insanlarla rastlaşmışam, amma son 10 gündə gördüklərim ən alçaq, ən yalançı və ən acgöz davranışdır. Belə bir insan – yalnız özünü və dostlarını zənginləşdirmək üçün bu cür dəyişiklikləri irəli sürən biri – futbolda keçmişin qalığıdır və gələcəkdə ona yer yoxdur.

Əgər bu ideya doğrudan da yaxşı idisə, niyə Dünya Çempionatının finalı ərəfəsində təşkilat üzvləri ilə bir otaqda olarkən onlara açıq şəkildə danışılmadı? Əgər plan düşünülmüş idisə, niyə risklər və üstünlüklər barədə məlumat verilmədi? Əgər bu sxem şəffaf idisə, niyə 30 milyon dollar illik maaş alacağınızı açıq demədiniz? Bunların heç biri edilmədi, çünki bu, pis və etibarsız ideyadır. Özəl investisiya fondlarının həmişə əldə etməyə çalışdığı dağıdıcı gəlirlər barədə məlumat gizlədilirsə, bu, cəsarətli addım deyil. Dünya Kubokunun payını satdıqdan sonra onu geri qaytarmaq mümkün olmayacaq və gələcək nəsillər bu hüquqdan məhrum olacaq. Əgər Dünya Kubokunu dostlarınıza təqdim etdikdən sonra Vaşinqtonda sizə beşqat yüksək maaşlı iş veriləcəksə, bu barədə də açıq danışmaq lazımdır", – deyə Fiqu öz köşəsində qeyd edib.