Arsen Venger FIFA-nın dünya çempionatının yayım hüquqlarının satışı ilə bağlı planlarına münasibət bildirib.

Offsideplus.az xəbər verir ki, ötən həftə FIFA-nın FIFA Forward Enterprise adlı yeni kommersiya qurumu yaratmaq niyyətində olduğu məlum olmuşdu. Lakin futbol konfederasiyalarının tənqidi və UEFA-ya üzv ölkələrin boykot təhlükəsi səbəbindən Canni İnfantino bu ideyadan imtina edib.

Venger bildirib ki, "FIFA-da mən qlobal futbolun inkişafı üzrə rəhbər vəzifəsini icra edirəm. Komandamla birlikdə oyun analizini, FIFA-nın onlayn tədris mərkəzini, 60 ölkədə 60 akademiyada gənclərin təlim sisteminin inkişafını və dünya üzrə gənclər turnirlərini kurasiya edirəm. Bundan əlavə, IFAB-da texniki məsləhətçiyəm. Bu strateji planın hazırlanmasında iştirak etməmişəm və layihə barədə ilk dəfə mediadan xəbər tutmuşam. Layihənin ləğv edilməsi qərarı tamamilə zəruri idi və şübhə doğurmur, çünki mən müstəqil, məsuliyyətli, şəffaf və ədalətli FIFA-nın futbolumuza xidmət etməsinə inanıram".